寫作題目:2018新目標

今日見到個「好基本」嘅寫作題目,就係「2018目標」。「目標」嘅存在,好似只係比人捱世界嘅時候無咁痛苦。而設定「目標」時又唔可以太離地,如果唔係就等待比多個失望自己。但對於一年嘅「目標」,太簡單,又好似諗嚟唔知為咩咁。之後就係開始一年人生嘅短期計劃嘅思辨:

當然,好似以上嘅情況鑽研落去,只係令人覺得你「好煩膠」(很麻煩)大家都係想輕輕鬆鬆鄧梓峰,你就咪咁煩,新年咪講句「恭喜發財」、簡單一點來講講自己當下理想咪算囉… …做咩又要人討論下「人生的意義」「認真思考」等等?賀歲片都唔會同你研究新年嘅意義,好笑夠吵就得架喇!

不過有啲人(即是我),每次想公開表達一啲訊息嘅時候,我都想認真咁去講一啲自己嘅諗法比人知。因為我會覺得係好難得可以同大家交流,就自然唔想太多廢話。(「廢話」不要對號入座,不是大家發表的文章,但我不想花時間去跟大家家義,總知唔係話大家)

咁又因為網絡嘅簡單又複雜嘅文化,往往打一句文字,唔同人有唔同嘅解讀,如果再用一啲幽默嚟修飾文句,不少人會因此誤解,之後我又要寫另一段文字來說穿自己的「真正意思」,咁係一件好「煩膠」嘅事,令文字變我冗長沒趣,正如以上兩段。之後又開始諗,我可唔可以介入一下自己嘅作品?

咁好老實講,我以寫作人自居,我點會唔係用自己嘅作品先行?但又講自己嘅作品,咁咪又係賣廣告比人罵?咁唔講自己作品,講咩?真係講句「心想事成」?就算唔講作品,可唔可以講寫作嘅嘢?咁關於寫作,咪即係我嘅作品囉?

再唔係,不如講下今年寫作大計(其實都未構思好),嚟緊我想好好準備一下今年參加比賽的作品,一共有四、五個,內容因為要比賽,所以無法分享。(即係無得講,講咗但如果唔得獎,成件事就會好柒頭)

而上斜體的段落,就係我本來想好好咁講下自己嘅目標時,個腦諗到嘅嘢。之後跳返出呢個框框,我就好想講下,其實無論咩目標都好,我都只係想專心做好寫作呢個部份,唔係因為我好認真、好鍾意、好有心。只係因為面對生活嘅蒼白無力,寫作就係我嘅色彩世界。

我最想分享嘅係呢種感覺。所以來年目標,是我希望在寫作上的點滴有更多更多的成就,可以跟大家分享!好似有啲抽象但又好直接咁同大家講咗,唔知大家明唔明。因為係要用粵文先可以直接講到自己內心嘅感覺,自己嘅文庫未能得心應手去寫我心情,抱歉、抱歉。

多媒體廢作人