奇華入鬼國 廣告七凶兆

中秋未至,鬼節流流。在意外頻生之月,自殺者眾之秋,奇華中秋廣告卻非團圓送暖,反似盂蘭鬼氣森森。奇華月餅廣告系列有七凶兆,真係大吉利市搵鬼食。事實上奇華今次真係搵鬼食,唔做人生意。地獄鬼國市場大,香港市場細,不如符合下鬼民口味仲有油水。大陸出名白事當紅事做,歌頌救災英雄;奇華月餅都紅事當白事做,中秋不團圓鬼影卻幢幢,先看奇華七凶兆:

壹、彼岸花蔓珠莎華,花葉不相見,生於陰森地,常見於墓前,喻意生離死別,兩不相見。

貳、紙油傘,用來供鬼藏身用。

叄、曾志偉持月餅之手,為到彼岸之佛手印。二人素衣似披麻戴孝。背景色為裹屍麻布色。

肆、荷花盛夏開放,秋天即會衰敗,殘花敗柳實屬不祥。白蓮花更是接引亡魂,度亡之花。

伍、藍白燈籠似喪事。

陸、佳「折」更實在,比起折扣,「折」字更似夭折之意。

柒、動畫廣告放紙船,是水陸法會濟海幽用。

凶兆眾多,若是昔日師奶阿嬋,一早就「啋過你把口」,然後就覺得咁邪都係唔買好過。鬼節流流,如果買奇華招惹陰魂,真係多得你唔少。不過對於不信鬼神報應,奉行無神論的大陸人來說,反而是獵奇之物。大陸人只當文化是裝飾,只有文明不文明,故此凶兆對於他們來說反而是閒趣點綴。失去了鬼神、道德約束的文化,就如脫韁野馬,胡亂奔馳。若你留意大陸廣告,你會發現以誇張為主,正正因為失去了好壞準則,只能嘩眾取寵。以寶礦力廣告為例,日本正正常常找個少女飲寶礦力,大陸偏要反地心吸力,獵奇一番。

此種獵奇文化,其實為重口味,類似SM或食飯一味落醬。重口味A片,往往皮鞭、繩綁、蒙眼、禁固等跨張而非常之物出齊,反映從人身上得不到性滿足,須以物品加強刺激,其或透過裝扮取得角色代替眼前人以刺激;食飯一味落醬,因為食物不好味,靠濃味醬料尋求刺激。一句到尾,重口味皆因不享受現有。昔日王朝中國,漁米之鄉如廣東,廣東菜味淡為主,嚐食物之真味,因為魚肥果熟,應有盡有。窮鄉僻壤如上海,常受倭寇侵擾,若耕種則只能被搶,難以安定發展。結果鳥不生蛋,靠重口味掩蓋食物難食。如此一來,就可理解大陸文化古怪醜惡之來由。要令文化重新豐富,就必需重新樹立正統道德、主流美學,使文化毋須靠重口味嘩眾取寵。

奇華不飲水思源,放棄它的根香港,已如北上港星,不是柒下柒下就是品味盡毀。既然佢唔打算尊重香港人,唔尊重傳統,自愛自重嘅香港人都無必要幫襯佢,等奇華求仁得仁,求鬼得鬼。

參考資料:
陳雲faceook帖文
網友Shirley Chiu、Alan Fok回應
奇華月餅廣告
寶礦力廣告

萬里